Ráðið

Ráðið

Ef ætlarðu' að svívirða saklausan mann,

þá segðu' aldrei ákveðnar skammir um hann,

en láttu það svona í veðrinu vaka,

þú vitir, að hann hafi unnið til saka.

 

En biðji þig einhver að sanna þá sök,

þá segðu, að til séu nægileg rök,

en náungans bresti þú helst viljir hylja,

það hljóti hver sannkristinn maður að skilja.

 

Og gakktu nú svona frá manni til manns,

uns mannorð er drepið og virðingin hans,

og hann er í lyginnar helgreipar seldur

og hrakinn og vinlaus í ógæfu felldur.

 

En þegar svo allir hann elta og smá

með ánægju getur þú dregið þig frá,

og láttu þá helst eins og verja hann viljir,

þótt vitir hans bresti og sökina skiljir.

 

Og segðu: "Hann brotlegur sannlega er,

en syndugir aumingja menn erum vér,

því umburðarlyndið við seka oss sæmir.

En sekt þessa vesalings faðirinn dæmir."

 

Svo leggðu með andakt að hjartanu hönd,

með hangandi munnvikjum varpaðu önd,

og skotraðu augum að upphimins ranni,

sem æskir þú vægðar þeim brotlega manni.

 

Já, hafir þú öll þessi happsælu ráð,

ég held þínum vilja þá fáir þú náð,

og maðurinn sýkn verði meiddur og smáður.

En - máske að þú hafir kunnað þau áður!

 

Höfundur: Páll J. Árdal

Athugasemdir

[Lára Hanna Einarsdóttir, 15.8.2009 kl. 02:14]

Glæsilegt og viðeigandi kvæði, Lilja. Takk.

[Jóna Kolbrún Garðarsdóttir, 15.8.2009 kl. 02:31]

Vel ort kvæði, og viðeigandi í dag. 

[Rauða Ljónið, 15.8.2009 kl. 04:17]

 Ykkur hefði farnast vel, og velgjörð mikla veita,Ef þið áður hefðu lært það vel,ráðið hans Palla Árdal.

[Rauða Ljónið, 15.8.2009 kl. 04:18]

 

Ykkur hefði farnast vel,

 

og velgjörð mikla veita,

 Ef þið áður hefðu lært það vel,

ráðið hans Palla Árdal

[Jenný Anna Baldursdóttir, 15.8.2009 kl. 09:46]

Algjörlega við hæfi.  Takk Lilja.

[Ragna Birgisdóttir (IP-tala skráð) 15.8.2009 kl. 09:58]

Frábært.

[Arinbjörn Kúld, 15.8.2009 kl. 10:50]

Afar lýsandi um ástandið hér á landi. Ég er farin að veigra mig við að tjá mig. Umræðan er farin að litast af hatri, niðurlægingu, óvirðingu, óþokkaskap osvfr. Ég tek ekki þátt í slíku. Í bloggum og umræðum í athugasemdum þá eru menn sem ekki eru sammála fávitar í augum hvers annars. Hálfvitar í besta falli.

En góða Lilja, þú er fín. Ég get varla lýst því hve leitt mér þykir hvernig er komið fyrir okkar ágætu hreyfingu. Engum einstaklingum á að leyfast að eyðileggja hreyfinguna, hvorki á þennan hátt né annan.

Kveðja að norðan.